गर्भवती असणे ही प्रत्येक स्त्रीसाठी एक अद्भुत भावना असते. तुम्ही गरोदर आहात हे तुम्हाला कळताच तुम्ही मातृत्वाच्या भावनांनी भारावून जाता. परंतु, त्याच वेळेला तुमच्या मनात बाळाचा विकास कसा होत आहे किंवा तुम्ही कोणता आहार घेतला पाहिजे इत्यादी विविध विचार येऊ लागतात. आणि अशा अनेक प्रश्नांनी तुमचे मन भरून जाते. ह्याचे कारण म्हणजे तुमच्या गरोदरपणाच्या सुरूवातीस किंवा तुमच्या पहिल्या तिमाहीमध्ये, तुम्हाला आणि तुमच्या बाळाला त्रास न होता गरोदरपणाचा प्रवास करण्यासाठी काय करावे हे तुम्हाला जाणून घ्यायचे असते.

व्हिडीओ:गरोदरपणाची पहिली तिमाही - काय अपेक्षित आहे?

पहिल्या तिमाहीचा कालावधी किती असतो?

ज्या क्षणी तुम्ही बाळाचा विचार करू लागता किंवा तुम्ही गरोदर राहता, तेव्हा तुम्हाला गरोदरपणात वेगवेगळी काळजी घ्यावी लागते. गरोदरपणाच्या पहिल्या तिमाहीत तुम्ही काळजी घेणे गरजेचे असते. आता तुम्ही विचार करत असाल कि पहिली तिमाही म्हणजे काय? त्याचा कालावधी किती काळ टिकतो? आमच्याकडे तुमच्या सर्व प्रश्नांची उत्तरे आहेत! तुमच्या पहिल्या तिमाहीचा कालावधी हा तुमच्या गरोदरपणाच्या पहिल्या तीन महिन्यांचा असतो. पहिली तिमाही तुमच्या गरोदरपणाच्या पहिल्या आठवड्यापासून सुरू होते. गरोदरपणाच्या तेराव्या आठवड्यात तुम्ही दुसऱ्या तिमाही मध्ये प्रवेश करता. जर तुमची मासिक पाळी नियमित असेल तर तुम्ही गरोदरपणाच्या पहिल्या आठवड्याला सहज सामोरे जाऊ शकता, तथापि, अनियमित मासिक पाळी असलेल्या स्त्रियांसाठी ते थोडे अवघड असू शकते.

पहिल्या तिमाहीतील गरोदरपणाची लक्षणे

जर तुम्ही गर्भवती असाल, तर तुम्ही गर्भारपणाच्या लक्षणांची आतुरतेने वाट पाहत असाल. येथे आपण तुमच्या गरोदरपणाच्या पहिल्या तिमाहीच्या लक्षणांवर चर्चा करणार आहोत.

1. तुमची पाळी थांबते: तुमच्या लक्षात येणारे गर्भधारणेचे पहिले लक्षण म्हणजे मासिक पाळी येत नाही. ह्याचे कारण म्हणजे तुमचे शरीर प्रोजेस्टेरॉनचे उत्पादन करण्यास सुरुवात करते, त्यामुळे तुम्ही तुमच्या बाळाला जन्म देईपर्यंत तुमची पाळी थांबते.

2. हलके डाग: गरोदरपणाच्या पहिल्या महिन्यात स्पॉटिंगचा अनुभव येणे खूप सामान्य आहे कारण गर्भाशयात भ्रूणाचे रोपण होत असते. रोपणाच्या प्रक्रियेमुळे स्पॉटिंग होऊ शकते तसेच पोटात पेटके येऊ शकता. परंतु पहिल्या तिमाहीत रक्तस्त्राव होणे सामान्य नाही. रक्तस्त्राव झाल्यास डॉक्टरांना कळवावे.

3. स्तनाची कोमलता: तुमचे स्तन दुखू शकतात आणि कोमल होतात. स्तनाग्रांच्या सभोवतालचा भाग म्हणजेच एरोला आणखी गडद होतो. तुम्हाला तुमच्या स्तनांवर शिरा देखील दिसू शकतात.

4. मनःस्थिती मध्ये बदल: तुम्ही तुमच्या बदलत्या मनःस्थितीशी सामना देत असता आणि ते गरोदरपणाचे एक सामान्य लक्षण आहे. गरोदरपणात संप्रेरकांमध्ये बदल होत असतात त्यामुळे मनःस्थितीत बदल होतात.

5. वारंवार लघवीला होणे: तुमच्या बाळाच्या वाढीला आणि विकासाला पाठिंबा देण्यासाठी तुमच्या ओटीपोटाजवळील भागाकडे रक्ताचा प्रवाह वाढतो. शरीरात वाढलेले द्रव सामावून घेण्यासाठी किडनीला जास्त काम करावे लागते. त्यामुळे मूत्राशयावर दाब पडतो आणि वारंवार बाथरूमला जावे लागते.

6. तुम्हाला थकवा जाणवू शकतो: तुमच्या शरीरात बरेच बदल होत असतात आणि ते सर्व सामावून घेण्यासाठी तुमच्या शरीराला कठोर परिश्रम करावे लागतात. त्यामुळे तुम्हाला थकवा जाणवू शकतो.

7. तुम्हाला बद्धकोष्ठता जाणवू शकते: बदलत्या हार्मोन्समुळे तुमचे शरीर वेगळ्या पद्धतीने काम करू लागते आणि त्यामुळे तुमच्या स्नायूंच्या कार्यावर सुद्धा परिणाम होऊ शकतो. प्रोजेस्टेरॉन तुमच्या स्नायूंना रिलॅक्स करते आणि प्रसूतीसाठी ते तयार करण्यास सुरुवात करते. त्यामुळे तुमच्या शरीराची इतर कार्ये सुद्धा मंदावतात. अन्न आतड्यांमधून हळूहळू पुढे सरकते आणि त्यामुळे बद्धकोष्ठता होते.

8. अन्नाची लालसा आणि तिरस्कार वाटणे: जे खाद्यपदार्थ तुम्हाला आधी आवडत नसतील त्यांची तुम्हाला लालसा वाटू शकते. ह्याउलट तुमचे आवडते अन्नपदार्थ आता तुम्हाला आवडणार नाहीत. गरोदरपणात अन्नाची लालसा आणि तिरस्कार खूप सामान्य आहे आणि प्रत्येक स्त्रीसाठी ते वेगवेगळे असते.

9. मळमळ आणि उलट्या: गरोदरपणाच्या दोन ते तीन आठवड्यांच्या आत मळमळ आणि उलट्यांचा सुरुवात होऊ शकते. ह्याला मॉर्निंग सिकनेस असेही म्हणतात. तथापि, तुम्हाला ते दिवसाच्या कोणत्याही वेळी जाणवू शकते.

10. छातीत जळजळ होण्याची भावना: तुम्हाला ऍसिड रिफ्लक्स किंवा छातीत जळजळ देखील होऊ शकते. ही तात्पुरती लक्षणे आहेत. शरीरातील संप्रेरकांच्या बदलामुळे अशी लक्षणे उद्भवतात. तुम्ही गरोदरपणाच्या प्रवासात पुढे जाताना ही लक्षणे कमी होऊ शकतात.

वर नमूद केलेल्या लक्षणांव्यतिरिक्त, पहिल्या तिमाहीत पेटके येणे, चक्कर येणे, डोकेदुखी किंवा पाठदुखी जाणवणे खूप सामान्य आहे. ही सर्व सामान्य गर्भधारणेची लक्षणे आहेत. ह्या लक्षणांद्वारे शरीरात बदल होत आहेत हे तुम्हाला समजते.

गर्भाचा विकास

तुमच्या शरीरात काय बदल होत आहेत किंवा तुमचे बाळ कसे विकसित होत आहे हे जाणून घेण्याची तुम्हाला उत्सुकता असेल. तुमच्या बाळाची पहिल्या तीन महिन्यांत प्रचंड वाढ होते. एका फलित पेशी (झायगोट) पासून ते प्लमच्या आकाराचे होते. त्यापासून हात, पाय आणि इतर विविध अवयव वाढू लागतात. तुमच्या पहिल्या तिमाहीत बाळाचा विकास कसा होतो ते पाहूयात:

• ६ आठवड्यांनंतर तुमच्या बाळाला लहान लहान हात पाय फुटण्यास सुरुवात होते आणि सुमारे १० आठवड्यांनंतर हात आणि पायाची बोटे विकसित होऊ लागतात.
• तुमच्या लहान मुलाची त्वचा ५ ते ८ आठवड्यांच्या दरम्यान तयार होण्यास सुरुवात होते. नखे आणि केस सुमारे ८ आठवड्यांनंतर तयार होऊ लागतात.
• तुमच्या बाळाची दृष्टी,चौथ्या आठवड्यापासून विकसित होण्यास सुरुवात होते. ह्यामध्ये ऑप्टिक नर्व्हस आणि लेन्सचा समावेश आहे. तर आठव्या आठवड्यात डोळयातील पडदा तयार होणे सुरू होते.
• तुमच्या बाळाचे हृदय पाचव्या आठवड्यापासून तयार होण्यास सुरुवात होते, परंतु ९ किंवा १० व्या आठवड्यात जेव्हा तुम्ही तुमच्या बाळाच्या हृदयाचे ठोके पहिल्यांदा ऐकू शकाल तेव्हा ते अधिक संरचित होतील.
• मेंदूचा विकास होण्यास आठव्या आठवड्यापासून सुरुवात होते.
• आठव्या आठवड्यात पचन संस्था विकसित होण्यास सुरुवात होईल.
• आठव्या आठवड्यात तुमच्या बाळाला स्पर्शाची भावना विकसित होईल. ओठ आणि नाकावर रिसेप्टर्सची निर्मिती होईल. १२व्या आठवड्यापर्यंत जननेंद्रियांवर, पायाच्या तळव्यावर आणि तळहातावर रिसेप्टर्स तयार होतील.
• ८ व्या आठवड्यात टेस्ट बड्स तयार होऊ लागतात. हे टेस्ट बड्स बाळाच्या मेंदूशी जोडलेले असतात. परंतु टेस्ट पोअर्स अद्याप तयार झालेले नसतात.

शरीरातील बदल

तुमच्या शरीरात अंतर्गत आणि बाह्य बदल होत असतात. येथे काही बदल दिलेले आहेत. हे बदल तुम्हाला तुमच्या शरीरात आढळू शकतात:

• तुम्हाला तुमच्या स्तनाच्या आकारात वाढ झालेली दिसू शकते आणि शरीरात वाढलेल्या स्रावामुळे असे होते.
• तुम्हाला पोट फुगल्यासारखे वाटू शकते. तुमची जीन्स किंवा पॅन्ट कंबरेभोवती घट्ट होऊ शकते.
• तुमच्या स्तनाग्रांभोवतीचा वर्तुळाकार भाग अधिक गडद आणि मोठा होईल.
• तुम्हाला अधिक योनि स्राव जाणवू शकतो.
• तुम्हाला स्पॉटिंगचा अनुभव येऊ शकतो.
• तुम्हाला चक्कर आल्यासारखे वाटू शकते.

वजन वाढणे

तुमच्या पहिल्या तिमाहीत तुमचे अंदाजे ३ ते ४ चार पौंड वजन वाढू शकते. परंतु, जर तुम्हाला तीव्र मळमळ होत असेल किंवा भूक कमी होत लागत असेल तर तुमचे वजन पुरेसे वाढू शकत नाही. तुम्ही तुमच्या पुढील तिमाहीमध्ये त्याची भरपाई करू शकणार असाल तर कोणतीही समस्या उद्भवणार नाही. परंतु, जर तुमच्या पहिल्या तिमाहीत तुमचे वजन कमी होत असेल किंवा खूप वाढले असेल, तर ह्या दोन्ही परिस्थिती चिंतेचे कारण आहे. गरोदरपणाच्या पहिल्या तिमाहीत तुमच्या वजनाच्या समस्यांबाबत तुमच्या डॉक्टरांशी संपर्क साधा.

व्यायाम

निरोगी शरीर आणि मनासाठी व्यायाम करणे अत्यंत महत्त्वाचे आहे आणि गरोदरपणात सुद्धा व्यायामाचे महत्व कमी केले जाऊ शकत नाही. गरोदरपणात काहीही त्रास होऊ नये तसेच गरोदरपणात निरोगी राहण्यासाठी तुम्ही व्यायाम करणे फार महत्वाचे आहे. येथे काही व्यायाम प्रकार दिलेले आहेत ते तुम्हाला गरोदरपणात सक्रिय आणि निरोगी राहण्यास मदत करू शकतात.

• चालणे: चालणे हा गरोदरपणातील सर्वोत्तम आणि सुरक्षित व्यायाम प्रकार आहे. जर तुम्ही आधीपासूनच चालण्याचा व्यायाम करत असाल आणि तर तुम्ही दररोज ३० मिनिटे सहज चालू शकता. परंतु, जर तुम्ही नियमित व्यायाम करत नसाल, तर आठवड्यातून तीन ते चार वेळा साधारण १०-१५ मिनिटे चालणे ही एक चांगली कल्पना आहे.
• जर तुम्हाला पोहता येत असेल आणि व्यायामाचा हा प्रकार आवडत असेल तर तुम्ही आठवड्यातून ३-५ वेळा दररोज ३० मिनिटे त्यामध्ये व्यस्त राहू शकता. पोहणे हा कमी-प्रभावी व्यायाम प्रकार आहे आणि गरोदरपणात तुमच्यासाठी खूप सुरक्षित आहे.
• मानसिक आणि शारीरिक आरोग्यासाठी योग उत्तम आहे. अशी अनेक गर्भधारणा आसने आहेत जी तुम्ही गरोदरपणात सुरक्षितपणे करू शकता.
• गरोदरपणात तंदुरुस्त राहण्यासाठी वजन प्रशिक्षण हा एक प्रभावी मार्ग आहे. परंतु, जास्त वजने उचलण्यापासून दूर रहा.
• तुम्ही सायकल चालवू शकता किंवा जिममध्ये बाइक चालवण्याचाही प्रयत्न करू शकता. परंतु, आपण आपला वेग आणि तीव्रता तपासत रहा.
• उत्साही आणि निरोगी राहण्यासाठी तुम्ही पायलेट्स देखील करू शकता. पायलेट्स करणे हे पाठीचा त्रास दूर ठेवण्यासाठी फायदेशीर आहे, आणि ते तुम्हाला तुमचे संतुलन राखण्यात देखील मदत करते.

वरील सर्व व्यायाम गरोदरपणात तुम्हाला तंदुरुस्त आणि निरोगी राहण्यास मदत करू शकतात. तथापि, तुम्हाला गर्भधारणा झालेली आहे हे तुमच्या लक्षात येताच, तुम्ही तुमच्या डॉक्टरांशी आपल्या व्यायामाच्या पद्धतीबद्दल बोलले पाहिजे. प्रत्येक गर्भारपण वेगळे असते आणि त्यामध्ये काही समस्या किंवा गुंतागुंत असू शकतात किंवा नसू शकतात. तुम्ही कोणत्याही प्रकारचा व्यायाम सुरू करण्यापूर्वी, तुमच्या डॉक्टरांची संमती घ्यावी.

पहिले तीन महिने तुम्ही कुठल्या गोष्टी केल्या पाहिजेत त्याची यादी खालीलप्रमाणे:

एक गरोदर स्त्री म्हणून, तुम्ही तुमच्याआणि बाळाच्या आरोग्यासाठी आणि कल्याणासाठी योग्य निवड करून निर्णय घेतले पाहिजेत. तुमच्या गरोदरपणाच्या पहिल्या तीन महिन्यांत तुम्ही काय करावे तसेच पहिल्या तिमाहीत तुम्ही कशी काळजी घ्यावी ह्याबद्दल मार्गदर्शन करू शकतील अशा काही टिप्स येथे दिलेल्या आहेत.

• तुम्हाला जर तुमच्या गर्भधारणेची घोषणा करायची असेल, तुमच्या मित्रांना आणि कुटुंबातील सदस्यांना त्याबद्दल सांगायचे असेल तर तुम्ही त्याबद्दल सांगू शकता. ज्या क्षणी तुम्हाला गर्भधारणा झालेली आहे हे कळेल त्या क्षणी तुम्हाला बातमी द्यावीशी वाटेल. परंतु, तुम्ही पहिली तिमाही संपेपर्यंत वाट बघणे चांगले कारण तो पर्यंत गर्भपाताशी संबंधित मोठे धोके कमी होतात.
• तुम्ही तुमच्या गरोदरपणाच्या आहाराची आणि पोषणाची योजना आखणे महत्वाचे आहे कारण तुमच्या बाळाला वाढण्यासाठी आणि विकसित होण्यासाठी तुम्हीच एकमेव स्त्रोत आहात. तुमच्या गरोदरपणाच्या आहारात ताजी फळे, भाज्या, तृणधान्ये, कडधान्ये, मांस, कुक्कुटपालन आणि दुग्धजन्य पदार्थ यांचा समावेश असल्याची खात्री करा.
• तुम्ही तुमची प्रसुतीपूर्व औषधे घेण्यास सुरुवात केली पाहिजे. ही औषधे गर्भाच्या चांगल्या वाढीसाठी आणि विकासासाठी महत्वाची आहेत आणि ही औषधे घेतल्यास तुमच्या बाळाला मज्जासंस्थेचे विविध जन्मदोष होण्याची शक्यता कमी होते.
• तुम्हाला तुमच्या गर्भधारणेबद्दल कळल्यानंतर लगेचच तुम्हाला डॉक्टर निवडण्याचा सल्ला दिला जातो.
• कोणतीही संभाव्य गुंतागुंत आणि जन्म दोष टाळण्यासाठी तुम्ही विविध चाचण्या आणि स्क्रीनिंग करून घ्यावे .
• तुम्ही चांगल्या विमा पॉलिसीची निवड करावी.
• आगामी खर्चासाठी तुम्ही नियोजन आणि बजेट तयार करून ठेवावे.
• तुमच्या संपूर्ण गरोदरपणात तुम्ही निरोगी आणि तंदुरुस्त राहण्यासाठी फिटनेस पथ्ये पाळली पाहिजेत.
• तुम्ही तुमच्या बाळाचे नाव ठरवून ठेवू शकता.

गरोदरपणाच्या पहिल्या तिमाहीतील आहार

आधी चर्चा केल्याप्रमाणे, तुमच्या गरोदरपणातील आहार आणि पोषणाकडे लक्ष देणे तुमच्यासाठी खूप महत्वाचे आहे. तुम्ही तुमच्या वाढत्या बाळाला पोषणही देत ​​आहात हे लक्षात ठेवा. तुमच्या बाळाच्या वाढीच्या आणि विकासाच्या गरजा पूर्ण करण्यासाठी तुम्हाला कॅलरीजचे प्रमाण वाढवावे लागेल. तुमच्या गरोदरपणातील अन्न आणि आहाराच्या बाबतीत तुम्ही काय करावे आणि काय करू नये ते येथे दिलेले आहे.

खाण्यासाठी पदार्थ:

निरोगी गरोदरपणासाठी तुम्ही खालील पदार्थांचा आहारात समावेश करू शकता

• तुमच्या आहारात ताज्या फळांचा समावेश करून तुमचे पोषण वाढवा. तुम्ही फळांचे रस देखील घेऊ शकता, परंतु फळे खाणे चांगले. ताजी फळे खाल्ल्याने तुम्हाला भरपूर प्रमाणात तंतुमय पदार्थ मिळतात. गरोदरपणातील बद्धकोष्ठतेचा त्रास कमी होण्यासाठी हे पदार्थ आवश्यक आहेत. कॅन केलेली फळे खाणे टाळा आणि त्याऐवजी ताजी फळे निवडा. तुम्ही दिवसातून ३-४ सर्विंग्ज फळे घेऊ शकता.
• भोपळा, पालक, काळे, रताळे, गाजर, टोमॅटो आणि इतर अनेक ताज्या भाज्या तुमच्या गरोदरपणाच्या आहारात समाविष्ट कराव्यात. तुम्ही एका दिवसात ३-४ वेळा भाज्या खाऊ शकता.
• मांस, पोल्ट्री आणि अंडी हे गरोदरपणात तुमच्या आहारात प्रथिनांचे प्रमाण वाढवण्यासाठी एक चांगला स्रोत आहे. गर्भाच्या विकासासाठी प्रथिने खूप महत्त्वाची आहेत. तथापि, जर तुम्ही शाकाहारी असाल, तर तुमच्या प्रथिनांच्या सेवनाची काळजी घेण्यासाठी तुम्ही आहारात भरपूर मसूर, बीन्स आणि नट्स ह्यांचा समावेश करू शकता.
• कॅल्शियम केवळ तुमच्यासाठीच आवश्यक नाही, तर गर्भाची हाडे आणि दातांच्या निर्मितीसाठी ते खूप महत्त्वाचे आहे. तुम्ही तुमच्या आहारात दुग्धजन्य पदार्थांच्या तीन सर्व्हिंगचा समावेश केला पाहिजे आणि अशा प्रकारे तुम्ही तुमच्या कॅल्शियमची गरज भागवण्यासाठी दूध, चीज, दही किंवा बटर घेतले पाहिजे.
• तुम्ही एका दिवसात तीन ते चार संपूर्ण धान्य खावीत. तुम्ही तृणधान्ये, संपूर्ण गव्हाचा ब्रेड किंवा इतर खाद्यपदार्थ खाऊ शकता.

टाळावेत असे पदार्थ:

तुमच्या गरोदरपणात तुम्ही खालील काही गोष्टी टाळल्या पाहिजेत:

• प्रक्रिया केलेले अन्नपदार्थ आणि जंक फूडपासून दूर राहा कारण ते केवळ अस्वास्थ्यकरच नाही तर त्यामुळे अनावश्यक वजनही वाढू शकते.
• कॅफिनचे सेवन कमी करा आणि अशा प्रकारे चहा, कॉफी किंवा कार्बोनेटेड पेयांपासून दूर रहा.
• न शिजवलेले मांस किंवा चिकन खाऊ नका.
• जास्त पाऱ्याचे प्रमाण असलेले सीफूड टाळा.
• न धुतलेली फळे आणि भाज्या खाऊ नका.
• मद्यपान आणि धूम्रपान करणे कठोरपणे टाळले पाहिजे.
• पाश्चराईझ न केलेले अन्नपदार्थ खाणे टाळा.

चाचण्या आणि स्क्रीनिंग

जर तुम्ही पहिल्यांदा गरोदर असाल, तर तुम्ही तुमच्या गरोदरपणाच्या लक्षणांमुळे गोंधळून जाऊ शकता.परंतु घरगुती गरोदर चाचणी किट मुळे तुम्ही गरोदर आहात हे तुम्हाला समजू शकते. परंतु बहुतेक डॉक्टर तुम्हाला गर्भधारणा झालेली आहे ह्याची पुष्टी करण्यासाठी इतर चाचण्या आणि स्क्रीनिंग पद्धती करतील. तुमचे डॉक्टर अवलंबू शकतील अशा काही चाचण्या आणि स्क्रीनिंग पद्धती खाली दिलेल्या आहेत

• शारीरिक तपासणी आणि इतर वैद्यकीय माहिती: तुमचे डॉक्टर तुम्हाला तुमच्या गर्भनिरोधक पद्धतीबद्दल आणि तुमच्या शेवटच्या मासिक पाळीबद्दल देखील विचारतील. तुमची गर्भधारणा निरोगी आहे की नाही तसेच कोणतीही गुंतागुंत किंवा जन्म दोष नाहीत ना हे पाहण्यासाठी संपूर्ण शारीरिक तपासणी देखील केली जाईल.
• लघवी आणि रक्त चाचण्या: तुमचे आरोग्य तपासण्यासाठी आणि गुंतागुंतीच्या संभाव्य लक्षणांबद्दल जाणून घेण्यासाठी लघवी आणि रक्त चाचण्या केल्या जातील.
• अल्ट्रासाऊंड: अल्ट्रासाऊंड स्कॅन केले जाऊ शकते. गर्भधारणा झालेली आहे हे निश्चित करणे आणि गर्भधारणेशी संबंधित कोणत्याही समस्या ओळखणे अल्ट्रासाऊंड मुळे खूप सोपे जाते.

वर नमूद केलेल्या मार्गांनी, तुमचे डॉक्टर तुमच्या गर्भधारणेची पुष्टी करतात. तसेच तुम्हाला तुमच्या गरोदरपणात उद्भवू शकणार्‍या कोणत्याही गुंतागुंतांबद्दल देखील तुम्हाला ते सांगू शकतात.

पहिल्या तिमाहीत घ्यावयाची खबरदारी

गर्भावस्थेच्या पहिल्या तिमाहीमध्ये तुम्ही घेतली पाहिजे अशी खबरदारी

1. गरोदरपणात आहाराची काळजी घ्या. कुपोषण तुमच्यासाठी किंवा तुमच्या बाळासाठी चांगले नाही. म्हणून, अपचनाच्या कोणत्याही लक्षणांपासून दूर राहण्यासाठी नियमित अंतराने चांगले आणि पोषक पदार्थ खा. बद्धकोष्ठतेचा त्रास होऊ नये म्हणून तुमच्या आहारात तंतुमय पदार्थांचा समावेश करा. उत्साही वाटण्यासाठी दिवसभर थोडे थोडे खा.
2. पुरेशा प्रमाणात पाणी प्या आणि द्रवपदार्थाचे प्रमाण वाढवा. निर्जलीकरणामुळे गरोदरपणात गुंतागुंत होऊ शकते, म्हणून दिवसातून किमान ८ ते १० ग्लास पाणी प्या.
3. शरीर योग्यरीत्या काम करण्यासाठी व्यायाम करणे महत्वाचे आहे आणि हेच गरोदर असताना देखील लागू होते. गरोदरपणात तंदुरुस्त राहण्यासाठी नियमित व्यायाम करा. तुम्ही कोणताही व्यायाम करण्याचा विचार करत असाल तर, त्याबद्दल तुमच्या डॉक्टरांशी बोला.
4. गरोदरपणात तुमची मानसिकता सकारात्मक असणे आवश्यक आहे. तुमचे मन आनंदी आणि सकारात्मक ठेवण्याचा सर्वोत्तम मार्ग म्हणजे ध्यानाचा सराव करणे.
5. गरोदरपणात विश्रांती घेणे खूप महत्वाचे आहे. गरोदरपणात तुमच्या शरीरात बरेच बदल होतात, त्यामुळे तुमचे शरीर योग्य रित्या कार्यरत राहण्यासाठी विश्रांती आणि झोप अनिवार्य आहे. तुम्हाला रात्री ७ ते ८ तासांची अखंड झोप मिळायला हवी आणि दिवसभरात दोन ते तीन वेळा तुम्ही छोटी झोप घेतली पाहिजे.
6. गर्भधारणेचा तुमच्या प्रतिकारशक्तीवर परिणाम होतो आणि त्यामुळे तुम्हाला विविध संसर्ग आणि इतर आजार होण्याची शक्यता वाढते. त्यामुळे स्वच्छता राखा आणि स्वतःची चांगली काळजी घ्या.

खालील लक्षणे आढळ्यास सावध रहा

बहुतेक स्त्रियांना गरोदरपणात काहीही अडचण येत नाही. परंतु, कधीकधी काही गुंतागुंत निर्माण होऊ शकते. त्वरीत उपाययोजना करण्यासाठी कोणत्याही समस्येची चिन्हे आणि लक्षणे समजून घेणे फार महत्वाचे आहे. आम्ही काही सावधानतेच्या चिन्हांवर इथे चर्चा करू. अशी चिन्हे लक्षणे आढळल्यास ताबडतोब डॉक्टरांशी संपर्क साधा,

• जर तुम्हाला योनीतून जास्त रक्तस्त्राव किंवा हलके डाग दिसले तर
• जर तुम्हाला जास्त मळमळ आणि उलट्या होत असतील तर
• तुम्हाला जास्त ताप असल्यास (१०१ अंशांपेक्षा जास्त)
• लघवी करताना जळजळ किंवा वेदना होत असल्यास
• जर तुम्हाला योनीतून जास्त स्त्राव होत असेल आणि खाज सुटत असेल तर
• जर तुमचा जुना आजार अचूक वाढला तर उदा: मधुमेह, दमा, ल्युपस इ.
• तुमच्या पायाला किंवा पायाच्या घोट्याला सूज आल्यास (रक्त गोठल्यामुळे) किंवा तीव्र डोकेदुखी (रक्त गोठल्यामुळे) जाणवत असल्यास

गरोदरपणाच्या पहिल्या तिमाहीविषयी ह्या सर्व गोष्टी तुम्हाला माहिती असणे आवश्यक आहे. आता तुमच्याजवळ गरोदरपणाच्या पहिल्या तिमाहीविषयी सर्व माहिती असल्याने स्वतःची काळजी घ्या आणि आनंदी रहा.

आणखी वाचा: